ದೈವಾರಾಧನೆಯ ಕಥೆ ಮತ್ತು ಕರಾವಳಿಯ ಮಣ್ಣಿನ ಸೊಗಡಿನ ಮೂಲಕ ಭಾರತೀಯ ಚಿತ್ರರಂಗದ ಗಮನ ಸೆಳೆದ ‘ಕಾಂತಾರ’ದ ಬಳಿಕ, ಕರಾವಳಿಯ ಬದುಕು, ಸಂಸ್ಕೃತಿ ಹಾಗೂ ಇಲ್ಲಿನ ಕಥನಶೈಲಿಯತ್ತ ಕನ್ನಡ ಚಿತ್ರರಂಗದ ಕುತೂಹಲ ಮತ್ತಷ್ಟು ಹೆಚ್ಚಾಗಿದೆ. ಇದೇ ನೆಲದ ಸೊಗಡನ್ನು ಹೊತ್ತು ಮತ್ತೊಂದು ಹೊಸ ಕಥೆ ಸಿನಿಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದೆ. ಅದೇ ‘ಗಾಡ್ ಪ್ರಾಮಿಸ್’.
ಕರಾವಳಿಯ ಪ್ರತಿಭೆ ಸೂಚನ್ ಶೆಟ್ಟಿ ನಿರ್ದೇಶಿಸಿ, ನಾಯಕನಾಗಿ ನಟಿಸಿರುವ ‘ಗಾಡ್ ಪ್ರಾಮಿಸ್’ ಚಿತ್ರ ನವೆಂಬರ್ನಲ್ಲಿ ರಾಜ್ಯಾದ್ಯಂತ ಚಿತ್ರಮಂದಿರಗಳಲ್ಲಿ ತೆರೆ ಕಾಣಲಿದೆ. ಈಗಾಗಲೇ ಚಿತ್ರದ ಮೇಕಿಂಗ್ ವಿಡಿಯೊ ಬಿಡುಗಡೆಯಾಗಿದ್ದು, ಚಿತ್ರದ ದೃಶ್ಯ ವೈಭವ, ಕಥೆಯ ಹಿನ್ನೆಲೆ ಹಾಗೂ ಚಿತ್ರತಂಡದ ಪರಿಶ್ರಮದ ಬಗ್ಗೆ ಕುತೂಹಲ ಮೂಡಿಸಿದೆ.
‘ಕಾಂತಾರ’ದ ಫಾರೆಸ್ಟರ್ ರವಿಯಿಂದ ನಾಯಕನ ಕುರ್ಚಿಯವರೆಗೆ!
‘ಕಾಂತಾರ’ ಚಿತ್ರದಲ್ಲಿ ಫಾರೆಸ್ಟರ್ ರವಿ ಪಾತ್ರದ ಮೂಲಕ ಪ್ರೇಕ್ಷಕರ ಗಮನ ಸೆಳೆದಿರುವ ಸೂಚನ್ ಶೆಟ್ಟಿ ಅವರಿಗೆ ಚಿತ್ರರಂಗ ಹೊಸದೇನಲ್ಲ. ಸಂಗೀತ ನಿರ್ದೇಶಕ ರವಿ ಬಸ್ರೂರು ನಿರ್ದೇಶನದ ‘ಕಡಲ್’ ಚಿತ್ರದಲ್ಲಿ ವಿಲನ್ ಪಾತ್ರದಲ್ಲೂ ಅವರು ಗಮನ ಸೆಳೆದಿದ್ದರು. ಇದರೊಂದಿಗೆ ಕನ್ನಡದ ಹಲವು ಚಿತ್ರಗಳ ಪ್ರಮೋಶನಲ್ ಕಾರ್ಯಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಅವರು, ಕರಾವಳಿಯಿಂದ ಚಿತ್ರರಂಗಕ್ಕೆ ಭರವಸೆಯ ಕಲಾವಿದರಾಗಿ ಗುರುತಿಸಿಕೊಂಡಿದ್ದಾರೆ.
ಇದೀಗ ‘ಗಾಡ್ ಪ್ರಾಮಿಸ್’ ಮೂಲಕ ಸೂಚನ್ ಶೆಟ್ಟಿ ಮತ್ತೊಂದು ಮಹತ್ವದ ಹೆಜ್ಜೆ ಇಡುತ್ತಿದ್ದಾರೆ. ಒಂದೇ ಚಿತ್ರದಲ್ಲಿ ನಾಯಕ ಮತ್ತು ನಿರ್ದೇಶಕ ಎಂಬ ಎರಡು ಜವಾಬ್ದಾರಿಗಳನ್ನು ಹೊತ್ತುಕೊಂಡಿರುವ ಅವರು, ಕರಾವಳಿಯ ಹಿನ್ನೆಲೆಯ ವಿಭಿನ್ನ ಕಥೆಯನ್ನು ತಮ್ಮದೇ ದೃಷ್ಟಿಕೋನದಲ್ಲಿ ತೆರೆಗೆ ತರುವ ಪ್ರಯತ್ನ ಮಾಡಿದ್ದಾರೆ.
ಕರಾವಳಿಯ ಕಥೆ… ಹೊಸ ನಿರೂಪಣೆ
‘ಗಾಡ್ ಪ್ರಾಮಿಸ್’ ಕೇವಲ ಒಂದು ಸಿನಿಮಾ ಎನ್ನುವುದಕ್ಕಿಂತಲೂ ಕರಾವಳಿಯ ಬದುಕು, ಇಲ್ಲಿನ ಜನರ ಭಾವನೆಗಳು, ಸಂಬಂಧಗಳು ಮತ್ತು ನೆಲದೊಂದಿಗೆ ಬೆಸೆದುಕೊಂಡಿರುವ ಕಥೆಯನ್ನು ಹೊಸ ರೀತಿಯಲ್ಲಿ ಹೇಳುವ ಪ್ರಯತ್ನ ಎನ್ನುವುದು ಚಿತ್ರತಂಡದ ಆಶಯ.
ಸದಭಿರುಚಿಯ ಕಥೆಯೊಂದನ್ನು ಪ್ರೇಕ್ಷಕರಿಗೆ ನೀಡಬೇಕು ಎಂಬ ಉದ್ದೇಶದಿಂದ ಸಾಕಷ್ಟು ಶ್ರಮ ವಹಿಸಿರುವ ಚಿತ್ರತಂಡ, ಕಥೆ ಮತ್ತು ದೃಶ್ಯ ನಿರೂಪಣೆಯ ಮೂಲಕ ಪ್ರೇಕ್ಷಕರನ್ನು ಹೊಸ ಅನುಭವದತ್ತ ಕರೆದೊಯ್ಯುವ ಸಿದ್ಧತೆಯಲ್ಲಿದೆ.
ಜೂಹಿ ಜಯಕುಮಾರ್ ಕನ್ನಡಕ್ಕೆ ನಾಯಕಿಯಾಗಿ
ಸೂಚನ್ ಶೆಟ್ಟಿಗೆ ನಾಯಕಿಯಾಗಿ ಜೂಹಿ ಜಯಕುಮಾರ್ ಕಾಣಿಸಿಕೊಳ್ಳುತ್ತಿದ್ದಾರೆ. ‘ಪವಿ ಕೇರ್ಟೇಕರ್’ ಹಾಗೂ ‘ತಲೈವನ್ ತಲೈವಿ’ ಚಿತ್ರಗಳ ಮೂಲಕ ಗಮನ ಸೆಳೆದಿರುವ ಜೂಹಿ, ‘ಗಾಡ್ ಪ್ರಾಮಿಸ್’ ಮೂಲಕ ಕನ್ನಡ ಚಿತ್ರರಂಗಕ್ಕೆ ನಾಯಕಿಯಾಗಿ ಪರಿಚಯವಾಗುತ್ತಿದ್ದಾರೆ.
ಇವರೊಂದಿಗೆ ಕರಾವಳಿ ಚಿತ್ರರಂಗದ ಜನಪ್ರಿಯ ಕಲಾವಿದರ ದೊಡ್ಡ ಬಳಗವೇ ಚಿತ್ರದಲ್ಲಿದೆ. ಪ್ರಮೋದ್ ಶೆಟ್ಟಿ, ಅರವಿಂದ್ ಬೋಳಾರ್, ರಘು ಪಾಂಡೇಶ್ವರ, ನವೀನ್ ಡಿ. ಪಡೀಲ್, ರೂಪಾ ವರ್ಕಾಡಿ, ಸಿದ್ಧಿ ಪ್ರಶಾಂತ್, ಪ್ರಸಿದ್ಧ ನಾಗ್, ಶೋಭಾ ಶೆಟ್ಟಿ, ಪ್ರತಿಮಾ ನಾಯಕ್, ಕರಣ್ ಕುಂದರ್, ಅಕ್ಷತಾ ರೈ, ರಾಧಾಕೃಷ್ಣ ಕುಂಬ್ಳೆ, ಪ್ರಭಾಕರ್ ಕುಂದರ್, ರಾಮ್ ಕುಮಾರ್ ಉಪ್ಪುಂದ, ಜಯಶೀಲಾ ಮರೋಳಿ ಸೇರಿದಂತೆ ಹಲವು ಕಲಾವಿದರು ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ತಾಂತ್ರಿಕವಾಗಿಯೂ ಭರವಸೆಯ ತಂಡ
ಪಾಂಚಜನ್ಯ ಫಿಲ್ಮ್ ಪ್ರೊಡಕ್ಷನ್ ಬ್ಯಾನರ್ನಡಿ ಮಹೇಂದ್ರ ಶೆಟ್ಟಿ ನಿರ್ಮಿಸುತ್ತಿರುವ ‘ಗಾಡ್ ಪ್ರಾಮಿಸ್’ ಚಿತ್ರಕ್ಕೆ ಪ್ರತಿಭಾವಂತ ತಾಂತ್ರಿಕ ತಂಡ ಕೈಜೋಡಿಸಿದೆ. ಭರತ್ ಮಧುಸೂದನ್ ಸಂಗೀತ ಸಂಯೋಜನೆ, ಗುರುಪ್ರಸಾದ್ ನರ್ನಾಡ್ ಛಾಯಾಗ್ರಹಣ, ನವೀನ್ ಶೆಟ್ಟಿ ಸಂಕಲನ ಹಾಗೂ ಅರ್ಜುನ್ ರಾಜ್ ಸಾಹಸ ನಿರ್ದೇಶನದ ಹೊಣೆ ಹೊತ್ತಿದ್ದಾರೆ. ಮೇಕಿಂಗ್ ವಿಡಿಯೊದಲ್ಲೇ ಚಿತ್ರದ ಮೇಕಿಂಗ್ ಗುಣಮಟ್ಟದ ಝಲಕ್ ತೋರಿಸಿರುವ ಚಿತ್ರತಂಡ, ನವೆಂಬರ್ನಲ್ಲಿ ಪ್ರೇಕ್ಷಕರ ಮುಂದೆ ಸಂಪೂರ್ಣ ಚಿತ್ರವನ್ನು ತೆರೆದಿಡಲು ಸಜ್ಜಾಗಿದೆ.
‘ಗಾಡ್ ಪ್ರಾಮಿಸ್’ ಮೇಲೆ ಹೊಸ ತಂಡದ ಭರವಸೆ
ಪ್ರತಿ ಬಾರಿ ಹೊಸತನವನ್ನು ಹುಡುಕುವ ಸಿನಿರಸಿಕರಿಗೆ ಹೊಸ ಕಥೆ, ಕರಾವಳಿಯ ಸೊಗಡು ಮತ್ತು ವಿಭಿನ್ನ ನಿರೂಪಣೆಯೊಂದಿಗೆ ‘ಗಾಡ್ ಪ್ರಾಮಿಸ್’ ರಸದೌತಣ ನೀಡಲು ಸಿದ್ಧವಾಗುತ್ತಿದೆ. ನಾಯಕನಾಗಿ ಮೊದಲ ಹೆಜ್ಜೆ ಇಡುತ್ತಿರುವ ಸೂಚನ್ ಶೆಟ್ಟಿ, ನಿರ್ದೇಶಕರಾಗಿಯೂ ತಮ್ಮದೇ ಛಾಪು ಮೂಡಿಸುವ ಉತ್ಸಾಹದಲ್ಲಿದ್ದಾರೆ. ಈಗಾಗಲೇ ಮೇಕಿಂಗ್ ವಿಡಿಯೊ ಮೂಲಕ ಕುತೂಹಲ ಮೂಡಿಸಿರುವ ‘ಗಾಡ್ ಪ್ರಾಮಿಸ್’, ನವೆಂಬರ್ನಲ್ಲಿ ಚಿತ್ರಮಂದಿರಕ್ಕೆ ಬರಲಿದೆ. ಕರಾವಳಿಯ ನೆಲದಿಂದ ಹುಟ್ಟಿದ ಈ ಹೊಸ ಪ್ರಯತ್ನ ಪ್ರೇಕ್ಷಕರ ಮನಸ್ಸಿನಲ್ಲಿ ಎಷ್ಟು ಗಟ್ಟಿಯಾಗಿ ಹೆಜ್ಜೆ ಗುರುತು ಮೂಡಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ. ಹೊಸ ಕನಸಿನೊಂದಿಗೆ ಚಿತ್ರರಂಗಕ್ಕೆ ಹೆಜ್ಜೆ ಇಡುತ್ತಿರುವ ಈ ತಂಡಕ್ಕೆ ಪ್ರೇಕ್ಷಕರ ಆಶೀರ್ವಾದವೇ ದೊಡ್ಡ ಬಲ.
