ಉಡುಪಿ : ಹೃದಯದ ಗಂಭೀರ ಸಮಸ್ಯೆ ಹಾಗೂ ಗರ್ಭಾಶಯದಲ್ಲಿದ್ದ ಎರಡು ಬೃಹತ್ ಫೈಬ್ರಾಯ್ಡ್‌ಗಳಿಂದಾಗಿ ಅತ್ಯಂತ ಅಪಾಯಕಾರಿಯಾಗಿದ್ದ ಹೆರಿಗೆಯನ್ನು ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯ ವೈದ್ಯರು ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ. ತಾಯಿ ಮತ್ತು ಆರೋಗ್ಯವಂತ ಹೆಣ್ಣು ಮಗುವಿನ ಜೀವವನ್ನು ಉಳಿಸುವುದರ ಜೊತೆಗೆ, ತೀವ್ರ ರಕ್ತಸ್ರಾವದ ನಡುವೆಯೂ ಮಹಿಳೆಯ ಗರ್ಭಾಶಯವನ್ನು ಸಂರಕ್ಷಿಸುವಲ್ಲಿ ವೈದ್ಯಕೀಯ ತಂಡ ಯಶಸ್ವಿಯಾಗಿದೆ. 32 ವರ್ಷದ ಮಹಿಳೆ 37 ವಾರಗಳ ಗರ್ಭಿಣಿಯಾಗಿದ್ದು, ಮಹಾಪಧಮನಿಯ ಕಿರಿದಾಗುವಿಕೆ ಸಮಸ್ಯೆಗೆ ಈ ಹಿಂದೆ ಸ್ಟೆಂಟ್ ಅಳವಡಿಸಿ ಚಿಕಿತ್ಸೆ ಪಡೆದಿದ್ದರು. ಇದರೊಂದಿಗೆ ಮಹಾಪಧಮನಿಯ ಕವಾಟದಲ್ಲಿ ಎರಡು ಪದರಗಳಿರುವ ಬೈಕಸ್ಪಿಡ್ ಏಆರ್ಟಿಕ್ ವಾಲ್ವ್ ಎಂಬ ಹೃದಯದ ಸಮಸ್ಯೆ ಹಾಗೂ ದೀರ್ಘಕಾಲದ ಅಧಿಕ ರಕ್ತದೊತ್ತಡವೂ ಇತ್ತು. ಈ ಹಿಂದೆ ಎರಡು ಬಾರಿ ಅಪಸ್ಥಾನಿಕ ಗರ್ಭಧಾರಣೆ ಸಂಭವಿಸಿ ಗರ್ಭಪಾತವಾಗಿದ್ದರಿಂದ, ಒಂದು ಫಾಲೋಪಿಯನ್ ಟ್ಯೂಬ್‌ನ್ನು ಶಸ್ತ್ರಚಿಕಿತ್ಸೆಯ ಮೂಲಕ ತೆಗೆದುಹಾಕಲಾಗಿತ್ತು.
ಇಂತಹ ಸಂಕೀರ್ಣ ಆರೋಗ್ಯ ಪರಿಸ್ಥಿತಿಯ ನಡುವೆ ಗರ್ಭಾಶಯದ ಗೋಡೆಯಲ್ಲಿದ್ದ ಎರಡು ಬೃಹತ್ ಫೈಬ್ರಾಯ್ಡ್‌ಗಳು ಚಿಕಿತ್ಸೆಯನ್ನು ಮತ್ತಷ್ಟು ಸವಾಲಿನದ್ದಾಗಿಸಿದ್ದವು. ಇವು ಕ್ಯಾನ್ಸರ್‌ಕಾರಕವಲ್ಲದ ಗಡ್ಡೆಗಳಾಗಿದ್ದು, ಅವುಗಳಿಗೆ ಹೆಚ್ಚಿನ ಪ್ರಮಾಣದಲ್ಲಿ ರಕ್ತ ಪೂರೈಕೆಯಾಗುತ್ತಿದ್ದ ಕಾರಣ ಹೆರಿಗೆಯ ವೇಳೆ ತೀವ್ರ ರಕ್ತಸ್ರಾವ ಸಂಭವಿಸುವ ಅಪಾಯವಿತ್ತು. ಇಂತಹ ಸಂದರ್ಭಗಳಲ್ಲಿ ತಾಯಿಯ ಜೀವ ಉಳಿಸಲು ಗರ್ಭಾಶಯವನ್ನೇ ತೆಗೆದುಹಾಕಬೇಕಾದ ಪರಿಸ್ಥಿತಿ ಎದುರಾಗುವ ಸಾಧ್ಯತೆಯೂ ಇತ್ತು. ಪ್ರಸೂತಿ ಮತ್ತು ಸ್ತ್ರೀರೋಗ ಶಾಸ್ತ್ರ ವಿಭಾಗದ ಘಟಕ ಮುಖ್ಯಸ್ಥೆ ಡಾ. ಜ್ಯೋತಿ ಶೆಟ್ಟಿ ಅವರ ನೇತೃತ್ವದಲ್ಲಿ ಪ್ರಸೂತಿ ತಜ್ಞರು, ಅರಿವಳಿಕೆ ತಜ್ಞರು ಹಾಗೂ ಇಂಟರ್ವೆನ್ಷನಲ್ ರೇಡಿಯಾಲಜಿ ತಂಡವು ಶಸ್ತ್ರಚಿಕಿತ್ಸೆಗೆ ಮುನ್ನವೇ ಸಮಗ್ರ ಯೋಜನೆ ರೂಪಿಸಿತ್ತು. ಇಂಟರ್ವೆನ್ಷನಲ್ ರೇಡಿಯಾಲಜಿ ತಜ್ಞ ಡಾ. ಹರ್ಷಿತ್ ಕ್ರಮಧಾರಿ ಅವರ ನೇತೃತ್ವದ ತಂಡವು ಗರ್ಭಾಶಯಕ್ಕೆ ರಕ್ತ ಪೂರೈಸುವ ಎರಡೂ ಆಂತರಿಕ ಇಲಿಯಾಕ್ ಅಪಧಮನಿಗಳಲ್ಲಿ ಸಣ್ಣ ಬಲೂನ್ ಕ್ಯಾಥೆಟರ್‌ಗಳನ್ನು ಅಳವಡಿಸಿತು. ಅಗತ್ಯವಿದ್ದಲ್ಲಿ ರಕ್ತದ ಹರಿವನ್ನು ತ್ವರಿತವಾಗಿ ನಿಯಂತ್ರಿಸುವುದು ಇದರ ಉದ್ದೇಶವಾಗಿತ್ತು. ಬಳಿಕ ಡಾ. ರೇಖಾ ಅವರೊಂದಿಗೆ ಡಾ. ಪ್ರತೀಕ್ಷಾ ಮತ್ತು ಡಾ. ದಿವ್ಯಾ ಸಿ. ಅವರು ಸಾಮಾನ್ಯ ಅರಿವಳಿಕೆ ಅಡಿಯಲ್ಲಿ ಸಿಸೇರಿಯನ್ ಶಸ್ತ್ರಚಿಕಿತ್ಸೆ ನಡೆಸಿದರು. ಈ ವೇಳೆ 2.6 ಕೆ.ಜಿ. ತೂಕದ ಆರೋಗ್ಯವಂತ ಹೆಣ್ಣು ಮಗು ಜನಿಸಿತು.
ನಿರೀಕ್ಷೆಯಂತೆ ಹೆರಿಗೆಯ ಸಂದರ್ಭದಲ್ಲಿ ತೀವ್ರ ರಕ್ತಸ್ರಾವ ಸಂಭವಿಸಿತು. ರಕ್ತನಾಳಗಳನ್ನು ಮುಚ್ಚಲು ಜೆಲ್‌ಫೋಮ್ ಬಳಸಿದ ಮೊದಲ ಪ್ರಯತ್ನ ನಿರೀಕ್ಷಿತ ಫಲಿತಾಂಶ ನೀಡಲಿಲ್ಲ. ಫೈಬ್ರಾಯ್ಡ್‌ಗಳಿಗೆ ಸಾಮಾನ್ಯಕ್ಕಿಂತ ಹೆಚ್ಚಿನ ಸಂಖ್ಯೆಯ ದೊಡ್ಡ ರಕ್ತನಾಳಗಳು ರಕ್ತ ಪೂರೈಸುತ್ತಿದ್ದುದೇ ಇದಕ್ಕೆ ಕಾರಣವಾಗಿತ್ತು. ನಂತರ ವೈದ್ಯಕೀಯ ತಂಡವು ಸೈಯಾನೋಅಕ್ರಿಲೇಟ್ ಗ್ಲೂ ಎಂಬ ವಿಶೇಷ ವೈದ್ಯಕೀಯ ಅಂಟು ದ್ರವ್ಯವನ್ನು ಬಳಸಿ ಎಡ ಗರ್ಭಾಶಯದ ಅಪಧಮನಿಯಿಂದ ಫೈಬ್ರಾಯ್ಡ್‌ಗಳಿಗೆ ರಕ್ತ ಪೂರೈಸುತ್ತಿದ್ದ ರಕ್ತನಾಳಗಳನ್ನು ಮುಚ್ಚಿತು. ಇದರಿಂದ ರಕ್ತಸ್ರಾವ ನಿಯಂತ್ರಣಕ್ಕೆ ಬಂತು.
ರಕ್ತಸ್ರಾವ ನಿಯಂತ್ರಣಕ್ಕೆ ಬಂದ ಬಳಿಕ ಅದೇ ಶಸ್ತ್ರಚಿಕಿತ್ಸೆಯ ಸಂದರ್ಭದಲ್ಲಿ ಎರಡೂ ಫೈಬ್ರಾಯ್ಡ್‌ಗಳನ್ನು ಯಶಸ್ವಿಯಾಗಿ ತೆಗೆದುಹಾಕಲಾಯಿತು. ಒಂದು ಫೈಬ್ರಾಯ್ಡ್ ಸುಮಾರು 15 × 14 ಸೆಂ.ಮೀ. ಗಾತ್ರ ಹಾಗೂ 960 ಗ್ರಾಂ ತೂಕ ಹೊಂದಿದ್ದರೆ, ಮತ್ತೊಂದು 14 × 12 ಸೆಂ.ಮೀ. ಗಾತ್ರ ಮತ್ತು 740 ಗ್ರಾಂ ತೂಕ ಹೊಂದಿತ್ತು. ಇವೆರಡರ ಒಟ್ಟು ತೂಕ ಸುಮಾರು 1.7 ಕೆ.ಜಿ. ಆಗಿತ್ತು. ಶಸ್ತ್ರಚಿಕಿತ್ಸೆಯಲ್ಲಿ ಸುಮಾರು ಎರಡು ಲೀಟರ್ ರಕ್ತ ನಷ್ಟವಾದರೂ, ಕೈಗೊಂಡ ಮುನ್ನೆಚ್ಚರಿಕೆ ಹಾಗೂ ಸಮಯೋಚಿತ ಚಿಕಿತ್ಸೆಯಿಂದ ಹೆಚ್ಚಿನ ಪ್ರಮಾಣದ ರಕ್ತ ವರ್ಗಾವಣೆಯ ಅಗತ್ಯ ಎದುರಾಗಲಿಲ್ಲ. ತಾಯಿ ಮತ್ತು ಮಗು ಸುರಕ್ಷಿತವಾಗಿದ್ದು, ಮಹಿಳೆಯ ಗರ್ಭಾಶಯವನ್ನೂ ಉಳಿಸಲಾಯಿತು. ಶಸ್ತ್ರಚಿಕಿತ್ಸೆಯ ಬಳಿಕ ವೈದ್ಯಕೀಯ ತಂಡವು ತಾಯಿಯ ಆರೋಗ್ಯದ ಮೇಲೆ ನಿಕಟ ನಿಗಾ ವಹಿಸಿತು. ಹೃದ್ರೋಗ, ದೊಡ್ಡ ಗಾತ್ರದ ಫೈಬ್ರಾಯ್ಡ್‌ಗಳು ಅಥವಾ ಗರ್ಭಾವಸ್ಥೆಯಲ್ಲಿ ಅಪಾಯ ಹೆಚ್ಚಿಸುವ ಇತರ ಆರೋಗ್ಯ ಸಮಸ್ಯೆಗಳಿರುವ ಮಹಿಳೆಯರು ಆರಂಭದಿಂದಲೇ ನಿಯಮಿತ ಪ್ರಸವಪೂರ್ವ ತಪಾಸಣೆ ಮಾಡಿಸಿಕೊಳ್ಳಬೇಕು. ಸೂಕ್ತ ಸೌಲಭ್ಯಗಳಿರುವ ಆಸ್ಪತ್ರೆಯಲ್ಲಿ ತಜ್ಞರ ಸಲಹೆಯೊಂದಿಗೆ ಹೆರಿಗೆಗೆ ಯೋಜನೆ ರೂಪಿಸಿಕೊಳ್ಳುವುದು ತಾಯಿ ಮತ್ತು ಮಗುವಿನ ಸುರಕ್ಷತೆಗೆ ಅತ್ಯಂತ ಮುಖ್ಯ ಎಂದು ವೈದ್ಯರು ಸಲಹೆ ನೀಡಿದ್ದಾರೆ.
