ಉಡುಪಿ : ಮಾಹೆ ಮಣಿಪಾಲದ ಹಿಮೋಫಿಲಿಯಾ ಚಿಕಿತ್ಸಾ ಕೇಂದ್ರದ ವತಿಯಿಂದ “ಬ್ರೈಡಿಂಗ್ ದಿ ಗ್ಯಾಪ್: ಫ್ರಮ್ ಡಯಾಗ್ನೋಸಿಸ್ ಟು ಲೈಫ್ ಲಾಂಗ್ ಕೇರ್ ಇನ್ ಬ್ಲೀಡಿಂಗ್ ಡಿಸಾರ್ಡರ್ಸ್” ಎಂಬ ಶೀರ್ಷಿಕೆಯಲ್ಲಿ ಒಂದು ದಿನದ ನಿರಂತರ ವೈದ್ಯಕೀಯ ಶಿಕ್ಷಣ ಕಾರ್ಯಕ್ರಮವು ಕಸ್ತೂರ್ಬಾ ಆಸ್ಪತ್ರೆಯಲ್ಲಿ ಯಶಸ್ವಿಯಾಗಿ ನಡೆಯಿತು.
ಮಾಹೆ ಮತ್ತು ಅಮೆರಿಕದ ಉತಾಹ್ ವಿಶ್ವವಿದ್ಯಾಲಯದ ನಡುವಿನ ವರ್ಲ್ಡ್ ಫೆಡರೇಶನ್ ಆಫ್ ಹಿಮೋಫಿಲಿಯಾ ಟ್ವಿನ್ನಿಂಗ್ ಪಾಲುದಾರಿಕೆಯಡಿಯಲ್ಲಿ ಆಯೋಜಿಸಲಾದ ಈ ಕಾರ್ಯಕ್ರಮದಲ್ಲಿ ವೈದ್ಯರು, ದಂತವೈದ್ಯರು, ಪ್ರಯೋಗಾಲಯ ತಂತ್ರಜ್ಞರು, ಟ್ರಾನ್ಸ್ಫ್ಯೂಷನ್ ಮೆಡಿಸಿನ್ ತಜ್ಞರು, ದಾದಿಯರು ಹಾಗೂ ವಿದ್ಯಾರ್ಥಿಗಳು ಸೇರಿದಂತೆ ಹಲವರು ಭಾಗವಹಿಸಿದ್ದರು. 18 ಮಂದಿ ಪ್ರಸಿದ್ಧ ಸಂಪನ್ಮೂಲ ವ್ಯಕ್ತಿಗಳು ಕಾರ್ಯಕ್ರಮದಲ್ಲಿ ಉಪನ್ಯಾಸ ನೀಡಿದರು.
ಕಾರ್ಯಕ್ರಮವನ್ನು ಉದ್ಘಾಟಿಸಿದ ಕಸ್ತೂರ್ಬಾ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ ಡಾ. ಅವಿನಾಶ್ ಶೆಟ್ಟಿ, ಕಸ್ತೂರ್ಬಾ ಆಸ್ಪತ್ರೆಯು ಸಮಗ್ರ ರಕ್ತಶಾಸ್ತ್ರೀಯ ವೈದ್ಯಕೀಯ ಸೇವೆಗಳನ್ನು ಒದಗಿಸಲು ಬದ್ಧವಾಗಿದೆ ಎಂದರು. , ಆರೋಗ್ಯ ವಿಜ್ಞಾನಗಳು ಸಹ ಕುಲಸಚಿವ ಡಾ. ಶ್ರೀಜಿತ್ ಜಿ. ಹಾಗೂ ಉತಾಹ್ ವಿಶ್ವವಿದ್ಯಾಲಯದ ರಕ್ತಸ್ರಾವ ಮತ್ತು ಹೆಪ್ಪುಗಟ್ಟುವಿಕೆ ಅಸ್ವಸ್ಥತೆಗಳ ಕೇಂದ್ರದ ಸಹಾಯಕ ವೈದ್ಯಕೀಯ ನಿರ್ದೇಶಕರು ಡಾ. ಶಶಿಧರ್ ಗೊಟೆಟಿ ಅವರು ಎಚ್ಟಿಸಿ ಟ್ವಿನ್ನಿಂಗ್ ಯೋಜನೆಯ ಉದ್ದೇಶಗಳನ್ನು ವಿವರಿಸಿದರು.
ಕಸ್ತೂರ್ಬಾ ಆಸ್ಪತ್ರೆಯ ಹಿಮೋಫಿಲಿಯಾ ಚಿಕಿತ್ಸಾ ಕೇಂದ್ರದ ಕ್ಲಿನಿಕಲ್ ಸಂಯೋಜಕಿ ಡಾ. ಅರ್ಚನಾ ಎಂ.ವಿ. ಅವರು ಅಥಿತಿಗಳನ್ನು ಸ್ವಾಗತಿಸಿದರು. ವೈದ್ಯಕೀಯ ಆಂಕೋಲಜಿ ವಿಭಾಗದ ಸಹಾಯಕ ಪ್ರಾಧ್ಯಾಪಕಿ ಡಾ. ಪವಿತ್ರಾ ಡಿ.ಎಸ್. ಅವರು ಪದವಿ ವಿದ್ಯಾರ್ಥಿಗಳಿಗಾಗಿ ಸಂವಾದಾತ್ಮಕ ರಸಪ್ರಶ್ನೆಯನ್ನು ನಡೆಸಿದರು. ಮಣಿಪಾಲ ಅಧ್ಯಾಯದ ಹಿಮೋಫಿಲಿಯಾ ಸೊಸೈಟಿಯ ಅಧ್ಯಕ್ಷೆ ಡಾ. ಸುಲೋಚನಾ ಬಿ. ಅವರು ಧನ್ಯವಾದ ಅರ್ಪಿಸಿದರು. ಡಾ. ಮಾತಂಗಿ ಕುಮಾರ್ ಕಾರ್ಯಕ್ರಮ ನಿರೂಪಿಸಿದರು.
